रूपगुणसंपन्न अभिनेत्री मधुरा वेलणकर-साटम!

'गोजिरी' या तिने साकारलेल्या भूमिकेप्रमाणेच असणारी आजच्या मराठी चित्रपट सृष्टीतील रूपगुणसंपन्न अभिनेत्री म्हणजे मधुरा वेलणकर-साटम!

'गोजिरी' (२००७) चित्रपटात मधुरा वेलणकर!

राष्ट्रीय पुरस्कार विजेत्या 'नॉट ओनली मिसेस राऊत' (२००३) या आपल्या पदार्पणातील मराठी चित्रपटातच मधुरा वेलणकर ने अभिनयाची चुणूक दाखवली होती..आणि त्यासाठी तिला उत्कृष्ट अभिनयाचा राज्य पुरस्कारही मिळाला! लगेचच ती 'जजंतरम ममंतरम' या हिंदी चित्रपटात राजकुमारी म्हणून झळकली!

'नॉट ओनली मिसेस राऊत' (२००३) 

चित्रपटात मधुरा वेलणकर!

त्यानंतर 'सरीवर सरी' (२००५) चित्रपटात ग्लॅमर विश्वात नाव करू पाहणारी आणि ''मी अमृता बोलतेय'' (२००८) या वास्तवदर्शी चित्रपटात अन्यायाला वाचा फोडणारी ह्या तिच्या व्यक्तिरेखा अभिनेत्री म्हणून तिला सिद्ध करणाऱ्या ठरल्या. त्यानंतर घरच्याच अभिजीत साटम दिग्दर्शित 'हापूस' (२०१०) चित्रपटात तर तिने भिन्न स्वभाव वैशिष्ठ्यांच्या दुहेरी भूमिका बेमालूम साकारल्या!

'सरीवर सरी' (२००५) चित्रपटात मधुरा वेलणकर!

याबरोबरच लघुपट, वृत्तपट, दूरचित्रवाणी मालिकां आणि नाटकांतून ती लक्षणीय भूमिका साकारीत आली आहे. 'संस्कृति', 'कलागौरव', 'झी', 'हीरकणी' आणि 'व्ही. शांताराम' असे अनेक पुरस्कार तिला मिळालेत!

प्रसिद्धीच्या झोतात असूनही आपले संवेदनशील मन आणि विनयशील सुस्वभाव हे तिने जपले असल्याची प्रचिती..अगदी तिच्या पहिल्या चित्रपटापासून आतापर्यंत तिला भेटताना नेहमीच आली!

वेलणकर आणि साटम अशा अभिनय कलेची पार्श्वभूमी असणाऱ्या परिवारांतील या सुस्वरूप अभिनेत्रीने यापुढेही रूपेरी पडदा गाजवावा..ह्यासाठी हार्दिक शुभेच्छा!!


- मनोज कुलकर्णी
['चित्रसृष्टी', पुणे]